..
..
عهدي بها قدام تلبس عبايه
وانا بعد البس شماغ وعقال
طفلين نتهجى حروف الكتابه
الله يامجمل سواليف الأطفال
كانت لنا في كل شارع حكايه
وكنا نقول علوم ماهيب تنقال
وكنت اتقاسم مامعاها معايه
من "عسكريم"التوت لـ(علك) ابو ريال
وكانت بعكسي شاطره بالقرايه
تقراء جزء عم وطه والأنفال
وانا لك الله من وراي غبايه
مدري ابو نقطه هو الذال او الدال!
وكانت لأبويه تشتكي من شقايه
وتعلمه كيف اربط الباب بحبال
ياما على ظهري كسر من عصايه
يقولي خلك وانا ابوك رجال
وامي تقول ادع لولدك بالهدايه
خوفي يصيبه كثرة الضرب بهبال
لشفتها مع اول الدرب جايه
مدري انا اللي ملت ولا الوطا مال
احس قلبي يرتجف في حشايه
ماكنه الا الضيف لهز فنجال
ياما عن (السعلي)تخبت ورايه
لاخوفوها فيه ثم شافت ظلال
تقول خلك يافلان معايه
واستانس العب عندها دور الأبطال
واغار حتى من عيون اصدقايه
لاطالوعها اقول "تكفووووووووون" ياعيال