[أبوالنون]

بسم الله الرحمن الرحيم
السلام عليكم و رحمة الله و بركاته

شكرا ً لكل من يتابع و لكل من أضاف بصمته الرائعة
ردودكم الجميلة مشجـّعة
فجزاكم الله كل خير
وإليكم

الحلقة السادسة

أبو عجيب : الواحد بعد هالأكل اللـّي بشهـّي بطـّل قادر يقوم من محلـّه , و بعدين معك يا أبو عجيب وقتيش بدّك تقول للمخلوقة كلمة شكر ؟ المشكلة مش طالعة منـّي مش عارف ليش !
يا مرة .. يا مرة .. و ينك فقعتي لي مرارتي الله يفقع مرارتك
أم عجيب : شو بدّك ؟
أبوعجيب : هاتيلك صحن القطايف تنسلـّى فيه مع المسلسل
أم عجيب : ما بدّك تروح على صلاة التراويح !؟
أبو عجيب : أي هو كل يوم ! خلاص الناس أوّلها بتشاطروا و بعدين سلامتك و تعيش
خلصينا بدنا نتفرّج على باب الحارة
هو صحيح إنهم عاملين حالهم رؤساء الطاولة المدوّرة
و كل واحد راسه قد الطنجرة و حكيهم كلـّه **** في *****
أي بس هينا بنتسلـّى
أم عجيب : بس إبنك راح على الصلاة !
أبو عجيب : ما شاء الله صاير شيخ هالغضيب
بس ما يسوّي زي هداك تبع " حلبانة السّيّالة "
أم عجيب : و شو هاي " حلبانة السّيّالة " !
أبو عجيب : هاذ واحد قلـّي إيـّاها , قال و هو بصلـّي سمع صوت غريب , مش غريب إبن جرانـّا لأ يعني صوت مش فاهمه , عنننننننن عننننن إحححح إح إح , و الصوت بقرّب منه وكل شوي بسمع صوت حد ثاني من المصلـّين بقول إحم إحم
و هو مش فاهم شو اللـّي بصير , لحد ما قرّب منه و فهم الطبخة , هاذ باقي ولد صغير يزق مفتاح سيارة أبوه في ظهور المصلـّين , و كل مرّة يقول عننن إحححح بدو يشغـّل , إذا قال المصلـّي إحم إحم بروح علـّي بعده و إذا لأ بقول " حلبانة
السّيـّالة "
أم عجيب : و شو هاي " حلبانة السّيـّالة " !!!!
أبو عجيب : يعني يا فصيحة " خربانة السـّيـّارة "

الوجه الآخر

أبو عجيب : تسلم إيديكي على النفس الطيبة اللـّي عندك
ما شاء الله يا أم الحبايب شو أكلك بشهـّي
الواحد بيقاوم بالعافية بدّيش أعبـّي معدتي لأنه الرسول عليه الصلاة و السلام قال : " ما ملأ ابن آدم وعاءً شرا ً من بطنه "
أو كما قال عليه الصلاة و السلام
و بعدين بدنا نروح انصلـّي و احنا مصحصحين إن شاء الله وكثرة الأكل بتخبـّل
عجيب : بابا خذني معاك للصلاة لو سمحت
أبو عجيب : لسـّا بدري عليك يا حبيبي , بس أتأكـّد إنك ميـّة بالميـّة بتستاهل تكون ضيف الله و بتعرف آداب الاستضافة عنده مش راح أستنـّاك تطلب منـّي
أم عجيب : الولد متشوّق يروح زي صحابه خذو معاك
أبو عجيب : يا ست الحبايب يا غالية طلباتك أوامر لكن أنا بدّي إيـّاه يروح لأنه بدّه يروح لبيت الله و هوعارف و متشوّق لهذا الفضل العظيم اللـّي أكرمنا في ربنا, مش يروح عشان صحابه , و ما باخذه طول ما أنا مش متأكـّد من إنه قد المسئوليـّة , الولاد في الجامع أغلبهم مع الأسف بشـَوشوا على المصلـّين و بقطعوا صلاتهم , ما بدنا إنعيب الناس و العيب فينا , فسامحيني
عجيبة : بابا بدّك انسجلـّك باب الحارة
أبو عجيب : الله يخليلي ها البطـّة الصغيرة الحلوة طبعا ً سجليها و بنحضرها مع بعض بكرة إن شاء الله
أم عجيب : أنا مش فاهمه كيف بتحضر مثل هالمسلسلات !
أبو عجيب : أولا ً ما بحب أفشل حبوبتي , ثانيا ً أنا ما بحضر ممكن أسمع سماع بس , الناس كلها مطبولة بباب الحارة على الأقل بدنا نعرف عن إيش بيحكوا عشان نعرف نجاري الناس و نحاكيهم و إذا صار بيناتنا لغة حوار بنعرف نوصللهم الكلمة الطيبة اللـّي بتنفعهم
عجيب : بابا ليش كل الناس بحبـّوا باب الحارة ؟
أبو عجيب :يابا تسلم لي على هالسؤال اللـّي بدل على فهمك
هاذ يابنيّي , الناس مشتاقة من جوّاتها للنظام و التكافل و المحبـّة و أيام زمان الحلوة الحنونة
مش عارفين يطبقوها في الواقع فبيلاحقوها في المسلسلات
الناس بدها يكونلها كبير و اللـّي ماله كبير ماله تدبير

اللهم صل ِ و سلم و بارك على الحبيب سيدنا محمد
وعلى آله و أصحابه أجمعين