[أبوالنون]

بسم الله الرحمن الرحيم
السلام عليكم و رحمة الله و بركاته



الحلقة الثامنة


أبو عجيب : شو هاذ كل هالوقت بس أسبوع واحد من رمضان راح
الله يعينـّا
أم عجيب : كل هالوقت و لسـّاتك ما عزمت حد يا أبو بطيخ
أبو عجيب : أبو بطيخ .. إن شاء الله بنسمع خبرك عل المريخ
إعزمي مين ما يكون بس ما تعزمي أبو النون

ما هذا يا أبا عجيب ألهذا الحد !!!! و لماذا ؟؟!!!؟

أبو عجيب : أي ما أنا إذا بقعد معك ثواني ياأبوالنون بتخلـّني مجنون
بكفـّي عاملني مضحكة للعالم و مصورني بوجهين !
لأ و كمان ماسك لي الفصحى أي ما إحنا بالعامية يا دوب خالصين
...................... [ لا تعليق ]
أم عجيب : سيبك منـّه و كلمني , وقتيش بدنا نعزمهم ؟
أبو عجيب : جكارة بأبوالنون إعزمي كل أهلك و كل أهلي إمك خواتك و زيجانهن و إخوتك و زوجاتهم الكبير و الصغير
حتى أبوكي إذا بتقدري تعزمي إعزمي
أم عجيب : أبوي ! بتتمسخر !
أبو عجيب : لأ بس قصدي تعزمي الكل , بدي أذبحلهم كبش
و أعمللهم هش و نش حتى مش بس ياكلوا لأ يهبشوا هبش
أم عجيب : وشو هالكرم المفاجئ هاذ !؟!؟!؟!؟!؟!؟!؟!؟!؟
أبو عجيب : عشان زوج أختك ما يشوف حاله عليّ
أم عجيب : !!!!!!!!!!!!!!!!!!!



الوجه الآخر




أبوعجيب : سبحان الله الوقت الحلو بطير طير
إمبارح كنـّا بنستنـّا رمضان و بنحضـّر له
و اليوم صار طاير منـّه أسبوع و زيادة
أم عجيب : حابـّة بس أذكرك بعزومة رمضان
أبو عجيب : الله يذكرك بالخير , شوبدنا نعمل بدونك ؟
بس أنا مش ناسي , اليوم بشتري لوازم العزومة
ما عليكي إلا تكتبي الـّلي بدك إيـّاه , و طبعا ً ما تنسي حصة الـّلي بالي بالك
ما بدّي أحكي لأنه أبوالنون ما شاء الله ناشر أخبارنا بين الناس
بلاش يكون كلامي سمعة و رياء
أم عجيب : و لا يهمـّك حصتهم قبل الكل , بس قل لي بدك تعزمهم زي كل سنة في الفندق وتعطيهم هدايا زي كل سنة ؟
أبو عجيب : يا أم الحبايب الله يسامحك , قلتلـّك أبوالنون ناشر كلامنا خلـّي كلامنا عن هالموضوع بعدين الله يسعدك
أم عجيب : هو الواحد بيستحي من عمل الخير !؟
أبو عجيب : لأ مش الفكرة أصلا ً الله سبحانه وتعالى قال في سورة البقرة آية 271 " إن تبدوا الصدقات فنعمـّا هي و إن تخفوها و تؤتوها الفقراء فهو خيرٌ لكم و يكفـّر عنكم من سيـّئاتكم والله بما تعملون خبير "
فيا بنت الحلال كلـّه خير , إذا الواحد ببديها فيمكن يدفع غيره يقلده , وببعد عن نفسه شبهة البخل , و إذا خفاها فكمان خير و تكفير سيئات , و إحنا سيئاتنا بترقص و بتغنـّي علوحدة و نص من كثرتها
فخلـّينا نجيبلها مبيد سيئات فعـّال
أستغفر الله العظيم , الله يسهـّل ويجيب الـّلي فيه الخير

اللهم صل ِ و سلم و بارك على الحبيب سيدنا محمد
وعلى آله و أصحابه أجمعين