خراريف طفوليه

[روز]

[align=center]

يسعد صباحكم / مسائكم بورد جوري معطر
من الاخررر
اجيت اذكركم بنهفات زمان واحنا زغنونين
للامانه ما هي فكره حلوه؟

تعو تذكرو مع بعض

بتتذكروا.. يوم يجي أخوك الأكبر منك ويقول لك:
بدك أرسم لك ساعة وانته تمد إيدك ويعضّك هديك العضة اللي تضل مرسومة أسبوع.

بتتذكروا.. يوم كنا نتصوّر عند مصوّر العيلة وطبعاً غصبن عنك الخلفية زرقاء
مش بكيفك ولازم تمشط شعرك بالمشط اللي عنده.. كله شعر..

بتتذكروا... المصاص الأحمر اللي بيعلق بالسنان ومعه عود لونه احمر مخطط بالأبيض
وكنا نقلبو بالمقلوب ونحطو ع الشمعة أو الغاز وننفخ مشان نساوي فقاقيع وطبعا ما
تطلع النفيخة لحتى تطلع زلاعيمك معها وتنحرق كل أصابيعك.

بتتذكروا.. يوم كنّا نشوف افتح يا سمسم ونتأثر بكعكه
اللي ياكل بسكوت ونشتري بسكوت ونضل ناكل زيه
وبعدين نحطو بطاسة مي أو بالمغسلة وناكلو عم يشرشر

.بتتذكروا.. يوم الجمعة ... نقوم من الصبح مشان
نسمع أغنية في قصص الشعوب قصائص لا تنتهي
وعالم حلو بهي يسكن في القلوب في قصص الشعوب .

بتتذكروا.. تيلفون أبوقرص اللي يهلك أصابيعك وانت تتصل ويا ويلك يطلع الرقم
مشغول لأنه ما في ريدايل.

بتتذكروا.. يوم كنا نربط الشرشف على رقباتنا زي سوبرمان ونطلع فوق الخزاين
ونط على التخوت وآخر شي ناطت غلط ومنكسرة إيدك.

بتتذكروا.. يوم كنا نحط الآيس أو الكازوزة بالكيس بالتلاجة مشان تصير متلجة وكل
ما بدك تجي تاخدها تلاقي امك حاطته تحت ومش متلّج.. يا حسرة.

بتتذكروا.. لما كانوا الأولاد يشطفوا البرندة بالصابون ويضلوا يتزحلكوا عليها طول
النهار وآخر الشي تنفكش اجر شي واحد وما ينام الليل لأنه اجره ورمانة..

بتتذكروا..لما كنا نستقبل الحجاج بكامل الفرحة واللهفة على الهدية والعيدية وآخر
شي: مسواك ومسبحتين والكاميرا الحمراء وسجادة وللبنات قطعة قماش عليها خرز وساعة.

بتتذكروا.. عزايم قبل والسفرة ومفرش الطاولة اللي عليه صورة (فواكه) وريحته
لازم زي ريحة المطبخ وقاعد على كراسي القش اللي لما تقوم تلاقي اجريك عليها شحوط
ومربعات.

بتتذكروا.. أيام الدراسة لما نشد حيلنا بالدراسة ونشتري قلم فسفوري أصفر أو
برتقالي مشان نظلل على الشي المهم وآخر شي نظلل على كل الكتاب.. وين الشي
المهم؟؟ ما بعرف!!!!

بتتذكروا.. أول ما يسرق الولاد سيارة أبوهم كانت الاجر اليمين على البنزين
والاجر الشمال على الفرام من شدة الفرحة .... ولازم طبعاً يمرك على ولاد الحارة
ويطلعلوا معو شي خمسين واحد


بتتذكروا.. لما تتقاتل مع ابن الجيران وتقول له: انقلع عن دارنا وعن رصيفنا...
يقول لك: مش رصيفكم هادا رصيف الحكومة
كلام منطقي, ويضل يمرق قدام البيت ويقول لك مادخلك.

بتتذكروا.. لما يروحوا الولاد السوق مع أبوهم أو أمهم مشان يشتروا اواعي
للعيد ..وآخر شي شارين اواعي زي بعض بس غير ألوان وتشوفهم بأول يوم العيد
من الأخ الكبير للصغير زي فرقة حسبالله.

بتتذكروا.. لما الشباب بدهم يعملو عضلات يرحوا يترسو علب النيدو باطون
ويحطون بينهن عمود حديد وهووووووووب وآخر شي منكسرة ضهورهم.


بتتذكروا...لما نشيل الشراشف ونعملهم خيم ...أو ناخذ المخدات الكبيرة
ونعملهم بيوت.




واللي ما عمل شي من المذكور فوق بيكون من جيل الهمبرغر وسبيس توون وأبطال
الديجتال..راحت عليكم هديك الأيام
أولاد هالأيام بتلاقيه عايش مرحلة وحده بس ألا وهي مرحة الكبار: سيارة وموبايل
و تدريجة وشحططة في الشوارع والمطاعم. ماشاف لا أفلام كرتون ولا لعب وهو
صغير..

أول ما يفتح التلفزيون بتلاقيه يتفرج ع هيفا ونانسي وروبي
وعلى أيامنا قصص عالمية و حديث الجمعة الديني وسهرة صباحية ع الشدة كل ليلة
خميس
وأم عمار ببرنامج ما يطلبه الجمهور
وعصمت رشيد يغني بين الشوطين
ويوم الجمعة سيران والله أيام


للأسف صار الجيل الجديد بلا هوية

كنتم مع الاخت RoSe

[/align]